Author Archives: malti

L-Ambaxxaturi tal-Qari fl-Iskola Primarja ta’ Ħal Għaxaq

Posted on by

Il-Ġimgħa, 31 ta’ Jannar 2014, l-Iskola Primarja ta’ Ħal Għaxaq laqgħet fil-klassijiet tagħha ħames mistednin speċjali. Dawn kienu l-Ambaxxaturi tal-Qari Claire Agius Ordway, Kurt Calleja, Keith Demicoli, Jessica Muscat u l-Ministru tal-Edukazzjoni, Evarist Bartolo.

L-Ambaxxaturi tal-Qari qraw  storja bil-Malti u oħra bl-Ingliż lit-tfal tal-Ewwel, it-Tieni u t-Tielet Sena. Wara, il-Klabb tal-Qari tal-istess skola organizza forum fuq il-qari fis-sala tal-iskola. Fih ħadu sehem it-tfal tar-Raba’, il-Ħames u s-Sitt Sena tal-istess skola, il-Ministru tal-Edukazzjoni, l-Ambaxxaturi tal-Qari, il-Professur Charles Mifsud, il-Prinċipal tal-Kulleġġ u l-Uffiċjali Edukattivi tal-Malti u l-Ingliż. L-attività ntemmet b’żewġ kanzunetti ta’ Jessica Muscat u Kurt Calleja.

 

Taqbila – għanjiet tat-tfal

Posted on by

taqbilaId-diska kompatta Taqbila fiha 17-il poeżija ta’ poeti Maltin magħrufa, fosthom Dun Karm, Anton Buttigieg, Karmenu Vassallo, Ġorġ Pisani u Patri Anastasju Cuschieri. Il-mużika għall-poeżiji nkitbet minn Mro Dominic Galea. Dawn imbagħad tkantaw mit-tfal tal-Kor Mirabitur immexxi minn Simone Attard.

Din is-CD qed titqassam lil kull għalliem/a tal-iskejjel primarji tal-istat mill-Uffiċjali Edukattivi tal-Malti tul din is-sena skolastika (2013-2014) u tul is-sena li ġejja (2014-2015).

L-għalliema jistgħu jiksbu wkoll xi karti tat-taħriġ u logħob marbut mal-istess għanjiet mis-sit elettroniku qawsalla.com. Tagħrif ieħor issibu minn din iċ-ċirkulari.

Films oriġinali mnebbħa mill-poeżiji tas-Sekondarja

Posted on by

Ftit tal-jiem oħra, l-għalliema tal-Malti u l-istudenti tal-Ewwel u t-Tieni Sena tas-Sekondarja se jkunu jistgħu jaraw fuq l-iskrins tal-kompjuters tagħhom u l-bords interattivi films qosra mnebbħa mill-poeżiji li hemm fis-sillabu tal-Malti. Dan kollu sar possibbli bis-saħħa ta’ proġett innovattiv li għaddej bejn l-Istitut tal-Arti u d-Disinn tal-MCAST u l-Uffiċjali Edukattivi tal-Malti tad-Dipartiment tat-Tmexxija tal-Kurrikulu fi ħdan il-Ministeru tal-Edukazzjoni.

Nirringrazzjaw lill-istudenti tal-Midja tal-Istitut tal-Arti u d-Disinn, lil-lettur tagħhom Ian Attard, lid-Direttur tal-Istitut Stephen Vella u lill-Assistenti Diretturi Melanie Mizzi u Mark Theuma tas-sehem tagħhom.

Jekk intom interessati f’dan il-proġett, iktbu lill-Uffiċjal Edukattiv David Muscat. Sadattant, tistgħu taraw b’għajnejkom stess x’inhu jsir billi ssegwu, minn hawn taħt, iż-żewġ siltiet mill-ewwel żewġ poeżiji li qed naħdmu fuqhom.

L-ewwel film imnebbaħ mill-poeżija ‘Il-Barri’ ta’ Ġorġ Pisani
 

It-tieni film imnebbaħ mill-poeżija ‘Wied Qirda’ ta’ Dun Karm

Kors fil-kitba bil-Malti

Posted on by

Il-Kors fil-Qari tal-Provi bil-Malti – offrut f’Malta u f’Għawdex

Jekk tuża l-Malti f’xogħlok u tixtieq ittejjeb il-kitba tiegħek bil-Malti, dan il-kors jgħodd għalik!

Ix-xahar id-dieħel (Frar 2014), id-Dipartiment tal-Malti fl-Università ta’ Malta u l-Kunsill Nazzjonali tal-Ilsien Malti se jiftħu d-disa’ kors fil-qari tal-provi bil-Malti. Għal sena oħra, dan il-kors se jkun offrut kemm f’Malta kif ukoll f’Għawdex.

Il-kors hu twil sena u l-lezzjonijiet tiegħu jsiru darbtejn fil-ġimgħa:

F’Malta: l-Università (l-Imsida), nhar ta’ Tnejn u nhar ta’ Ħamis, mill-5.30pm sat-8.30pm.

F’Għawdex: l-Università (ix-Xewkija), nhar ta’ Ġimgħa mill-5pm sad-9pm u nhar ta’ Sibt mit-8.00am sa 12.00pm. Il-kors mhux neċessarjament li jerġa’ jiftaħ is-sena d-dieħla f’Għawdex ukoll, għalhekk inħeġġu lill-Għawdxin biex jaħtfu din l-opportunità.

Il-kors, minbarra li jħarrġek u jgħinek tirrevedi l-grammatika u l-ortografija tal-Malti biex tirfina l-kitba tiegħek bil-Malti, jagħtik ukoll l-opportunità li tiddiskuti u tifhem aħjar ir-regoli tal-kitba tal-Malti. Għal dan il-għan jinkludi kemm lezzjonijiet prattiċi ta’ korrezzjoni, kif ukoll sessjonijiet fuq il-kitba u t-tiswija tal-Malti bil-kompjuter.

Huwa kors imfittex ħafna minn dawk li jużaw il-Malti f’xogħolhom u fil-pubblikazzjonijiet, bħalma huma l-ħaddiema tal-kunsilli lokali u tal-parroċċi, l-impjegati taċ-Ċivil u tas-settur Privat, l-għalliema tal-Malti u mhux, dawk li jaħdmu fl-istamperiji, ix-xandara u l-ġurnalisti (gazzetti, internet u televixin), it-tradutturi, u kull min jixtieq jikteb il-Malti bla żbalji. Hemm diversi dipartimenti tal-Gvern li jieħdu l-inizjattiva b’interess u jħallsu l-kors għall-impjegati tagħhom. Barra minn hekk, tista’ tikkwalifika wkoll għall-Iskema TSS tal-Korporazzjoni għax-Xogħol u t-Taħriġ (ETC) li tissussidjalek parti mill-ħlas tal-kors.

L-applikazzjonijiet fetħu diġà u jibqgħu jintlaqgħu sal-Ġimgħa, 17 ta’ Jannar 2014. Il-formola tal-applikazzjoni timtela u tintbagħat mis-sit tal-Università.

Minn hawn issib il-ktejjeb bit-tagħrif kollu fuq il-kors (pdf). Tagħrif ieħor fuqu u fuq l-applikazzjoni ssibu minn dan is-sit  jew billi tikteb direttament lill-Kunsill Nazzjonali tal-Ilsien Malti.

Sejħa għall-Offerti għal Testi Letterarji

Posted on by

Mill-Gazzetta tal-Gvern tal-31 ta’ Diċembru 2013, nru 19,189 (p. 14,085).

Id-Direttur Ġenerali, Id-Diviżjoni Servizzi Korporattivi, fil-Ministeru għall-Edukazzjoni u x-Xogħol jgħarraf li:

Sal-10.00 a.m. tat-Tlieta, il-21 ta’ Jannar, 2014 jintlaqgħu offerti magħluqin fil-kaxxa tal-offerti fit-Taqsima tal-Procurement, Kamra 205, Id-Diviżjoni tas-Servizzi Korporattivi fil-Ministeru għall-Edukazzjoni u x-Xogħol, Il-Bini tal-Edukazzjoni, Triq l-Assedju l-Kbir, Il-Furjana għal:

Avviż Nru. DQSE 278/13. Ġbir u stampar ta’ “Testi Letterarji tal-Malti għall-Ewwel u t-Tieni Sena tas-Sekondarja”.

L-offerti għandhom isiru flimkien mal-kundizzjonijiet relattivi u dokumenti oħra li jinkisbu mingħajr ħlas mit-Taqsima tal-Procurement, Kamra 205, Id-Diviżjoni tas-Servizzi Korporattivi fil-Ministeru għall-Edukazzjoni u x-Xogħol, Il-Bini tal-Edukazzjoni, Triq l-Assedju l-Kbir, Il-Furjana bejn it-8.30 a.m. u l-11.30 a.m.

Dawk interessati jistgħu jattendu għall-ftuħ u l-iskedar tal-offerti fil-ħin u d-data msemmija hawn fuq.