50 għalliem itemmu kors fl-ortografija

Posted on by

Fil-ġimgħat li għaddew ħamsin għalliem tal-Primarja minn skejjel differenti tal-Istat, tal-Knisja u Indipendenti temmew kors volontarju ta’ aġġornament fl-ortografija tal-Malti. Dawn issa se jkunu aktar sodi fl-użu tal-Malti fil-klassijiet li jgħallmu. Nifirħulhom minn qalbna.

Il-kors ġie organizzat mill-Uffiċjali Edukattivi tal-Malti fi ħdan id-Dipartiment tat-Tmexxija tal-Kurrikulu bi sħab mal-Kunsill Nazzjonali tal-Ilsien Malti.

Iċ-ċerimonja qasira tal-għoti taċ-ċertifikati saret fil-preżenza tal-għalliema tal-kors, is-Sur Karl Scicluna u s-Sur Chris Giordano, u matulha tkellmu s-Sur David Agius Muscat, l-Uffiċjal Edukattiv inkarigat mit-tagħlim tal-Malti fil-Primarja, is-Sur Gaetano Bugeja, id-Direttur tat-Tmexxija tal-Kurrikulu, u l-Prof. Ray Fabri, il-President tal-Kunsill Nazzjonali tal-Ilsien Malti. Ħajr lis-Sur Thomas Pace, id-Direttur tal-Kunsill, għall-għajnuna tiegħu biex sar dan il-kors.

Fix-xhur li ġejjin se nkomplu norganizzaw aktar korsijiet bħal dawn għall-għalliema.

Il-kanzunetta tal-Milied 2014

Posted on by

Fl-istazzjon tal-YouTube tagħna ‘ilsien pajjiżi’ tellajna l-kanzunetta tal-Milied għal din is-sena, Frans tal-Posta, miktuba mill-awtur Trevor Żahra u mmużikata minn Sammy Galea. Għamilnielha f’għamla ta’ filmat bit-tpinġijiet ta’ Trevor Żahra stess, biex tkun tista’ titgawda b’mod sabiħ mit-tfal u l-kbar. Fil-filmat hemm ukoll iż-żigarella bil-kliem għaddej ħalli t-tfal tal-Primarja jkunu jistgħu jkantaw magħha.

Din il-kanzunetta ssibha fid-diska kompatta ‘Kewkba – Għanjiet tal-Milied’ maħruġa mill-Bank APS, bi sħab mal-Mro Dominic Galea, li ġentilment tana l-permess biex nużawha u nxerrduha mal-iskejjel tagħna.

Nittammaw li togħġobkom u nawgurawlkom il-Miled it-tajjeb!

Tista’ tara wkoll il-kanzunetta l-oħra tal-Milied.

Taħriġ bil-qwiel għall-Primarja

Posted on by

Bosta għalliema talbuna taħriġ għall-qwiel li nsibu fil-listi uffiċjali tar-Raba’, tal-Ħames u tas-Sitt Sena tal-Primarja. Hawnhekk issibu taħriġ li tistgħu tużawh fil-klassijiet tagħkom. Nirringrazzjaw lis-Sa Josette Baldacchino li ħejjiet dan it-taħriġ.

Infakkru lill-għalliema ta’ dawn is-snin li fl-eżamijiet tagħhom annwali tagħhom jistgħu joħorġu biss mill-qwiel li hemm fil-listi, skont is-sena. Tagħrif ieħor jista’ jinqara miċ-ċirkolari.

Lista ta’ kliem f’ordni alfabetika

Posted on by

Listi ta kliem

Qed intellgħu lista ta’ kliem f’ordni alfabetika li tista’ tintuża mill-għalliema tas-snin bikrin waqt it-taħriġ li jagħmlu għall-għarfien tal-ewwel ittra fi kliem. Kull kelma fiha l-istampa marbuta magħha. Din ir-riżorsa tista’ tintuża wkoll mal-istudenti li għadhom qed jitgħallmu l-Malti biex iwessgħu l-vokabularju tagħhom.

Nirringrazzjaw lill-għalliema, is-Sa Josette Baldacchino, li għamlitlna din ir-riżorsa li żgur se ssibuha tant utli mat-tfal tagħkom.

Din il-lista tistgħu ssibuha fit-taqsima tal-kinder, u tal-ewwel tliet snin tal-primarja.

Kartolini tal-Milied u riżorsi oħra

Posted on by

KartolinaIl-Milied reġa’ wasal u bħalissa fl-iskejjel tagħna nibdew inħabblu moħħna kif se narmaw il-kurituri u l-klassijiet. Infakkrukom biex tużaw messaġġi bil-Malti, bħal Il-Milied it-Tajjeb, Xewqat Sbieħ, Is-Sena t-Tajba, u oħrajn.

Hawnhekk għandkom pass pass kif tagħmlu kartolini tal-presepju (istruzzjonijiet u forom għat-tqasqis) u tas-siġra tal-Milied (istruzzjonijiet u forom għat-tqasqis). Nirringrazzjaw lill-għalliema Josette Baldacchino li ħadet ħsieb tibni dawn il-preżentazzjonijiet bir-ritratti biex intom tkunu tistgħu taħdmu dawn il-kartolini fil-klassijiet tagħkom.

Nistiednukom tidħlu hawnhekk fejn għandkom aktar riżorsi fuq il-Milied.