Il-Jum Internazzjonali tal-Lingwa Materna

Posted on by

Ta’ kull sena, fil-21 ta’ Frar, l-UNESCO tfakkar il-Jum Internazzjonali tal-Lingwa Materna. It-tema ta’ din is-sena hija “Il-Lingwa Materna bħala l-Lingwa ta’ Struzzjoni u Inklużjoni fl-Edukazzjoni”.

B’dan il-Jum, l-UNESCO tagħmilna aktar konxji mill-importanza tal-użu tal-ilsien nattiv u, b’mod partikolari din is-sena, qed tisħaq fuq l-importanza ta’ lsienna bħala dritt fis-sistema edukattiva billi tħeġġeġ il-membri tagħha, inkluż Malta, biex jippromwovu l-ilsien nazzjonali bħala l-lingwa ta’ struzzjoni fis-sistema edukattiva tagħhom.
 
Il-messaġġ tal-Jum Internazzjonali 2012 issibu minn hawn.

Għal tagħrif ieħor dwar dan il-Jum tista’ tidħol f’dan is-sit tal-UNESCO.

Aqra aktar fuq il-prinċipji tan-Nazzjonijiet Uniti minn hawn.

Tista’ taqra wkoll dawn l-artikli:

> Li titkellem bil-lingwa nattiva tiegħek mhix ħaġa inferjuri

> Il-lingwa u d-dritt għall-edukazzjoni

> Dinja mingħajr kliem?

> Il-bilingwiżmu fl-edukazzjoni ta’ Wales

> Il-multilingwiżmu fl-edukazzjoni

> Il-bilingwiżmu u l-iżvilupp tal-moħħ

> Pubblikazzjonijiet oħra tal-UNESCO

“Learning in a language they can understand is vital for children to enjoy their right to quality education. Mother Tongue and Multilingual Education are key to reducing discrimination, promoting inclusion and improving learning outcomes for all.” 
UNESCO

“ […] ma jistax ikun hemm edukazzjoni vera b’lingwa barranija […]
il-lingwa tal-post biss tista’ tistimula l-oriġinalità fil-ħsieb, fil-biċċa l-kbira tan-nies.“
Mahatma Gandhi 1920, Young India 16/6

Tajjeb ngħidu li mhix biss in-Nazzjonijiet Uniti li tħaddan dan il-prinċipju. L-Unjoni Ewropea, li tagħha pajjiżna hu wkoll membru, qed tmexxi dejjem iżjed ‘il quddiem il-programm tal-multilingwiżmu tagħha tal-1 plus 2 languages. L-għan tiegħu hu li kull ċittadin Ewropew ikun kompetenti, qabelxejn, fil-lingwa nattiva tiegħu u f’żewġ ilsna barranin oħra magħha.

Għall-pubblikazzjonijiet tal-Unjoni Ewropea, idħol hawn.

Jekk jinteressak dan is-suġġett, inħeġġuk tkompli taqra wkoll ir-riżorsi tat-taqsima “Il-Bilingwiżmu”, fuq ix-xellug tas-sit.

Laqgħat ma’ aktar minn 250 ġenitur

Posted on by

Wasalna f’nofs is-sena skolastika u nieħdu pjaċir li f’dawn l-ewwel xhur kellna l-opportunità li niltaqgħu mhux biss ma’ ħafna għalliema li qed jgħallmu fil-primarji imma wkoll mal-ġenituri li qed jibagħtu lil uliedhom fl-iskejjel primarji.

F’Novembru tal-2011 iltqajna darbtejn ma’ 50 ġenitur li jibagħtu lil uliedhom fl-iskola primarja tal-Qrendi, fil-Kulleġġ San Benedittu. Nirringrazzjaw lill-Kap tal-Iskola, is-Sur Karm Pace. Fl-istess xahar iltqajna ma’ 120 ġenitur li jibagħtu lil uliedhom fl-iskola primarja taż-Żejtun, immexxija mis-Sur Brian Craus, u ta’ dan nirringrazzjawh. Nhar it-13 ta’ Frar 2012 iltqajna ma’ 60 ġenitur li wliedhom imorru fl-iskejjel primarji tal-Kulleġġ Santa Klara. Nirringrazzjaw lill-Prinċipal tal-Kulleġġ, is-Sa Maria Ciappara, ta’ din l-opportunità sabiħa.

F’dawn il-laqgħat mal-ġenituri tkellimna dwar l-ilsien sabiħ tagħna u fl-istess waqt indirizzajna xi diffikultajiet li jsibu waqt li jkunu qed jagħtu daqqa t’id lil uliedhom fit-taħriġ tad-dar. Huwa ta’ pjaċir kbir għalina li jkollna laqgħat bħal dawn u kull darba nagħmlu kuraġġ bl-interess li l-ġenituri għandhom għal ilsienna.

Laqgħat mal-għalliema tal-primarja

Posted on by

Tul dawn l-aħħar erba’ snin iltqajna mal-għalliema kollha li jgħallmu fl-iskejjel primarji tal-Istat, kemm f’Malta u kif ukoll f’Għawdex. Iltaqjna u tkellimna dwar ilsienna u ffukajna l-aktar fuq l-ortografija tal-Malti. Nirringrazzjaw lill-Prinċipali kollha li stidnuna u lill-Kapijiet, l-Assistenti tagħhom u lill-għalliema kollha tal-iskejjel li tawna l-appoġġ tagħhom.

Nirringrazzjaw ukoll lill-Kunsill Nazzjonali tal-Ilsien Malti li dejjem sibnieh biex jagħtina l-għajnuna tiegħu. Ħafna drabi dawn il-laqgħat għamilniehom flimkien mal-Professur Manwel Mifsud, ma’ Dr George Farrugia u mas-Sur Olvin Vella, ilkoll letturi tal-Malti fl-Università ta’ Malta u membri tal-istess Kunsill. Grazzi wkoll lill-ħbieb tagħna Thomas Pace, Lawrence Deguara u Karl Scicluna li sibniehom dejjem meta tlabniehom.

Din is-sena skolastika reġgħu stidnuna l-iskejjel tal-Qrendi u taż-Żejtun. Huwa dejjem ta’ pjaċir għalina li nitkellmu magħkom fuq ilsienna.

Ninu Cremona – 40 sena minn mewtu

Posted on by

Nhar il-Ġimgħa, 24 ta’ Frar 2012, fis-6.30pm, l-Akkademja tal-Malti se ttella’ taħdita fil-Biblijoteka Nazzjonali ta’ Malta, il-Belt, fuq Ninu Cremona kittieb u studjuż tal-Malti f’għeluq l-40 sena minn mewtu. It-taħdita, bl-isem “Ninu Cremona, Ħajtu u Ħidmietu”, se jagħmilha s-Sur Joe Camilleri.

Dawk kollha li għandhom għal qalbhom l-istorja ta’ lsienna huma mħeġġa jattendu għal din it-taħdita u fl-istess ħin iżuru l-wirja li hemm fil-Biblijoteka bħalissa dwar ix-xogħlijiet ta’ Ninu Cremona.

Tagħrif ieħor fuq Cremona tista’ tisiltu mis-sit tal-Akkademja tal-Malti.

Preżentazzjoni fuq Ninu Cremona ssibha mit-taqsima tal-“Kartolini” fuq il-lemin tas-sit.

Ara wkoll iċ-ċirkulari li ntbagħtet fl-iskejjel.

Taħriġ fil-ħiliet bażiċi għas-sekondarja

Posted on by

Mit-13 sas-17 ta’ Frar 2012, għoxrin għalliem u għalliema tal-Malti attendew kors qasir ta’ taħriġ fil-ħiliet bażiċi fiċ-Ċentru Nazzjonali tal-Kurrikulu, il-Ħamrun. Il-kors organizzah id-Dipartiment tal-Assigurazzjoni tal-Kwalità (QAD).

Fil-kors l-għalliema tħarrġu u ddiskutew strateġiji u metodoloġiji effettivi fit-tagħlim tal-ħiliet bażiċi, fosthom il-metodu multisensorjali, il-metodu fonetiku, it-tagħlim tal-lingwa b’mod sħiħ, u l-assessjar formattiv. L-għalliema ntwerew ukoll għadd ta’ riżorsi xierqa għat-tagħlim tal-ħiliet bażiċi kif ukoll filmati ta’ prattiċi tajbin miġbuda f’xi skejjel sekondarji. Min irid aktar tagħrif jew jeħtieġ xi għajnuna biex jgħallem il-Malti lil studenti bi bżonnijiet partikolari jista’ jibgħat ittre lil david.muscat.4@ilearn.edu.mt.

Il-preżentazzjonijiet tas-Sur Muscat, li ntużaw waqt il-kors, tista’ tarahom mit-taqsima tal-Ħiliet Bażiċi fuq il-lemin tas-sit.

L-għalliema tal-Malti li attendew għall-kors fil-ħiliet bażiċi, flimkien mal-Uffiċjali Edukattivi tal-Malti, is-Sur David Muscat u s-Sur George Mifsud, u mal-Kap tad-Dipartiment tal-Malti, is-Sur Marlon Barbara