Ninfurmawkom li ħarġet sejħa għal għalliem/a tar-riżorsi teknoloġiċi tal-Malti. Aktar dettalji ssibuhom fiċ-Ċirkulari HR97/2013 mit-taqsima taċ-Ċirkularijiet tas-sit.
L-applikazzjonijiet jagħlqu fit-3 ta’ Ġunju 2013.
Taħdita oħra suċċess
L-Akkademja tal-Malti u d-Dipartiment tal-Kurrikulu u t-Tagħlim Elettroniku organizzaw taħdita oħra interessanti fil-21 ta’ Mejju fuq il-vokali i fil-Malti. Din saret minn Reno Fenech.
Ħadna pjaċir bl-attendenza numeruża li kien hemm.
Wara t-taħdita saret diskussjoni fuq id-diffikultajiet li qed jiltaqgħu magħhom l-għalliema u kien hemm qbil li għandhom isiru aktar laqgħat ta’ diskussjoni bħal dawn biex ikun hawn aktar għarfien fuq ilsienna.
Laqgħat mal-awturi
Nifirħu lill-għalliema tal-Malti tal-Iskola Sekondarja tas-Subien ta’ Santa Venera (mill-Kulleġġ Santa Tereża) li, fl-okkażjoni tal-Ġimgħa tal-Librerija li ttellgħet fl-iskola tagħhom, organizzaw żewġ laqgħat għall-istudenti mal-awturi Victor Fenech u Carmel G. Cauchi.
Fit-23 ta’ April, l-istudenti kollha tat-Tielet Sena ltaqgħu mal-awtur Victor Fenech. Miegħu ddiskutew diversi aspetti tal-letteratura u l-lingwistika Maltija. Victor Fenech ħa gost iwieġeb il-mistoqsijiet li sarulu. Fenech tkellem ukoll fuq dawk l-affarijiet li jispirawh biex jikteb u fuq il-fatt li l-lingwa Maltija hi ħajja u dinamika. Għalhekk qiegħda dejjem tinbidel u m’għandniex għax nistagħġbu b’ lessiku ġdid li minn żmien għal żmien jidħol fiha.
Min-naħa tiegħu, l-awtur u l-Eks Assistent Kap ta’ skola, Carmel G. Cauchi ltaqa’ mal-istudenti tal-Ewwel Sena. Dawn kienu ppreparati bil-mistoqsijiet, b’materjal maħdum minnhom stess (li ttella’ f’wirja) u b’għadd ta’ kotba miktuba minnu. Cauchi ffirmalhom ħafna minnhom u kellimhom fuq l-esperjenza tal-kitba tiegħu.
Bl-apprezzament muri minn dawn l-istudenti, konvinti li laqgħat oħra bħal dawn jirnexxu u jkomplu jressquhom dejjem aktar lejn il-kotba u l-libreriji tagħna. Inħeġġu lil skejjel oħra biex, bħalma għamlu dawn l-għalliema ta’ Santa Venera, ilaqqgħu wkoll lill-istudenti tagħhom mal-awturi tal-letteratura Maltija.
Taħdita fuq il-kitba tal-vokali ‘i’ fil-Malti
Inħeġġu lill-għalliema kollha biex jattendu għal taħdita interessanti fuq il-vokali ‘i’ fil-bidu ta’ kliem Rumanz fil-Malti.
It-taħdita se ssir it-Tlieta, 21 ta’ Mejju 2013 mill-5pm sas-6pm fiċ-Ċentru Nazzjonali tal-Kurrikulu (NCC), il-Ħamrun, u se tingħata mis-Sur Reno Fenech.
Tagħrif ieħor fuq it-taħdita ssibu minn din iċ-ċirkulari u minn din it-tagħrifa.
Il-Premju Nazzjonali tal-Ktieb
Il-Kunsill Nazzjonali tal-Ktieb jgħarraf li fetħu l-applikazzjonijiet għall-edizzjoni tal-Premju Nazzjonali tal-Ktieb 2013 għall-aħjar xogħlijiet bil-Malti u b’lingwa oħra li ġew ippubblikati għall-ewwel darba fi ktieb matul l-2012.
Is-sottomissjonijiet għandhom jaslu għand is-Segretarju, Il-Librerija Pubblika Ċentrali, Il-Furjana mhux aktar tard minn nofsinhar tal-Ġimgħa, 31 ta’ Mejju 2013.
Tagħrif ieħor issibuh mis-sit tal-Kunsill tal-Ktieb.