Mistoqsijiet fuq l-Ortografija Maltija 1

Posted on by

L-Akkademja tal-Malti flimkien mal-Uffiċjali Edukattivi tal-Malti, David Agius Muscat, George Mifsud u David Muscat, organizzaw sessjoni ta’ tweġib għal mistoqsijiet dwar problemi pendenti fuq l-ortografija tal-Malti.

Is-sessjoni saret fis-27 ta’ April 2012, mill-5.30 sas-7 ta’ filgħaxija fiċ-Ċentru Nazzjonali tal-Kurrikulu (NCC), il-Ħamrun, u mexxieha s-Sur Carmel Azzopardi, il-President tal-Akkademja tal-Malti u awtur ta’ diversi kotba.

Għaliha attendew b’mod volontarju numru sabiħ ta’ għalliema tal-primarja u s-sekondarja mill-iskejjel tal-Istat, tal-Knisja u Indipendenti u staqsew il-mistoqsijiet tagħhom fuq l-ortografija Maltija.

L-għalliema li għandhom mistoqsijiet dwar l-ortografija tal-Malti huma mħeġġin jaraw it-taqsima tal-Ortografija li hemm fuq il-ġenb tal-lemin ta’ dan is-sit. Hemmhekk kontinwament intellgħu l-mistoqsijiet l-aktar komuni tal-għalliema. Jekk ma ssibx tweġiba minn hemm, tista’ tibagħtilna l-mistoqsija tiegħek.

Ara wkoll it-tagħrif fuq din l-attività mill-paġna taċ-ċirkularijiet (Ċirkulari 77/2012).

Karti tat-taħriġ fuq Zito Zandarell

Posted on by

Inroddu ħajr u nifirħu lill-għalliema tal-Malti, is-Sa Tiziana Bugeja, li tgħallem fl-Iskola Sekondarja tal-Bniet, il-Mosta, tal-Kulleġġ Marija Reġina, talli għoġobha tgħaddilna għadd ta’ karti tat-taħriġ u preżentazzjonijiet fuq il-ktieb Zito Zandarell ta’ Carmel G. Cauchi. Prosit tassew!

Dan il-materjal tajjeb għal dawk l-għalliema li jkunu qed jirrevedu l-ġrajjiet ta’ Zito mal-istudenti tal-ewwel sena tas-sekondarja. L-ewwel sett ta’ karti tat-taħriġ issibuh hawn.

Fit-taqsima tal-Ħiliet Bażiċi tellajna wkoll il-leħħiet tas-sillabi kv u vk għal dawk l-għalliema li jinqdew bil-metodu tal-ispellija biex jgħallmu lill-istudenti tagħhom jaqraw u jiktbu bil-Malti.

Saħħa u tislijiet,

David Muscat
Uffiċjal Edukattiv tal-Malti

Sorpriża lill-President ta’ Malta

Posted on by

Il-Kunsill Nazzjonali tal-Ilsien Malti flimkien mad-Dipartiment tal-Malti tal-Primarja tad-Direttorat għal Kwalità u Standards fl-Edukazzjoni ppreżentaw lill-President tar-Repubblika ta’ Malta, l-E.T. Dr George Abela, l-għanja bil-Malti tal-Ferħ u Awguri (Happy Birthday) fl-okkażjoni ta’ għeluq sninu.

Il-Kor Anima mmexxi mis-Sa Marlene Gatt kanta l-għanja tal-Ferħ u Awguri miktuba minn Manwel Mifsud fuq il-melodija tradizzjonali tal-Happy Birthday u l-għanja Qalbhom Tajba fuq il-melodija tradizzjonali ta’ He’s a Jolly Good Fellow.

Fl-istess okkażjoni l-President ingħata ċart, bil-kliem tal-istess żewġ għanjiet, iddisinjata minn Trevor Żahra u ppubblikata mill-Kunsill Nazzjonali tal-Ilsien Malti. Din l-okkażjoni saret bil-kollaborazzjoni tal-Uffiċċju tal-President.

Kienet ilha tinħass il-ħtieġa li fost id-diversi verżjonijiet b’lingwi barranin ta’ dawn iż-żewġ għanjiet popolari ferm madwar id-dinja, ikun hemm ukoll il-verżjoni Maltija biex tintuża fl-iskejjel u f’okkażjonijiet festivi oħra.

Iċ-ċart u d-diska kompatta bl-għanjiet, li ġiet irrekordjata għand Lito’s Place bl-ilħna tat-tfal tal-Proġett Kreattiv ta’ Ħal Safi akkumpanjati mill-Mro Dominic Galea, se jitqassmu lil kull klassi tal-iskejjel primarji ta’ Malta u Għawdex.

[Show thumbnails]

Avviż – l-Eżami ta’ Tmiem il-Primarja

Posted on by

Bħala parti importanti mill-eżerċizzju tal-Eżami ta’ Tmiem l-Edukazzjoni Primarja, inħarġet talba għall-għalliema li jixtiequ jikkoreġu l-karti tal-istudenti.

Nixtiequ nfakkrukom li dan ix-xogħol isir barra l-ħin tal-iskola u bi ħlas żejjed. F’dan l-eżami tal-Malti hemm 2 karti – waħda bl-eżerċizzji tas-smigħ u l-qari u l-oħra tal-kitba.  Min hu interessat nitolbuh jaqra l-informazzjoni maħruġa f’din iċ-ċirkulari. Tista’ timla din il-formola biex tapplika.

Min ikun jeħtieġ aktar tagħrif jista’ jċempel lil xi wieħed minna, l-Uffiċjali Edukattivi tal-Malti inkarigati mis-settur tal-Primarja.

Nirringrazzjawkom bil-quddiem.

Riżorsi Supplimentari tal-Malti

Posted on by

Sejħa għal Sottomissjoni ta’ Riżorsi Supplimentari tal-Qari bil-Malti
għall-Ewwel sas-Sitt Sena tal-Livell Primarju

Id-Dipartiment tal-Kurrikulu u l-eLearning fi ħdan id-Direttorat għal Kwalità u Standards fl-Edukazzjoni qiegħed jitlob is-sottomissjoni ta’ riżorsi supplimentari tal-qari bil-Malti mill-Ewwel sas-Sitt sena tal-livell primarju biex l-iskejjel jagħżlu minn fosthom fix-xhur li ġejjin. Id-Dipartiment iżid ir-riżorsi supplimentari tal-qari bil-Malti regolarment biex l-iskejjel ikollhom f’idejhom lista aġġornata.

Il-lista tar-riżorsi supplimentari tal-qari bil-Malti, li hi ppubblikata fis-sit uffiċjali tal-Malti, se tiġi aġġornata wara li jsir il-proċess tal-għażla. Il-kotba li hemm diġà fil-lista, m’hemmx għalfejn ikunu sottomessi mill-ġdid.

Id-Direttur tal-Kurrikulu jistieden lill-awturi, pubblikaturi, distributuri ta’ kotba u lil dawk kollha involuti f’dan il-qasam biex jibagħtu kopja/i ta’ skema/i u/jew riżorsi ta’ qari bil-Malti fil-livell primarju għal skop ta’ evalwazzjoni. Ir-riżorsi mibgħuta għandhom ikunu bil-prezz ikkwotat magħhom.

Linji Gwida

Ir-riżorsi tal-qari jridu jissodisfaw dawn il-kundizzjonijiet:

1. Ikunu konformi mal-prinċipji u l-linji gwida tal-Kurrikulu Minimu Nazzjonali.
2. Ikunu konformi mal-għanijiet u l-miri ta’ tagħlim tas-Sillabu Nazzjonali 2006. Kopji tal-aħħar verżjoni tiegħu jinkisbu minn dan is-sit elettroniku.
3. Jinkludu grafika/illustrazzjonijiet/stampi li jkunu kompatabbli ma’ testi u kuntesti ta’ ġeneri varji.
4. Ikunu addattati għal firxa ta’ ħiliet li wieħed isib fl-iskejjel primarji u li jkunu wkoll addattati għal strateġiji diversi ta’ tagħlim.
5. Preferibbilment jinkludu riżorsi u materjal ieħor t’għajnuna għall-għalliema.
6. L-għażla tar-riżorsi ssir skont iċ-ċekkjatura tal-qari.

Ir-riżorsi għandhom jiġu sottomessi sa mhux aktar tard minn nhar it-23 ta’ April 2012 f’nofsinhar, u għandhom jintbagħtu lil:

Is-Sa Agnes Borg (Segretarja)
Bord tal-Għażla tal-Kotba tal-Malti
Ir-Riżorsi Supplimentari tal-Qari bil-Malti (Primarja)
Iċ-Ċentru tal-Kurrikulu
Il-Mall
Il-Furjana FRN 1460

Il-kotba sottomessi jingħataw lura lill-propjetarji fi żmien raġonevoli.
Ara l-ħolqa mill-Gazzetta tal-Gvern tat-23 ta’ Marzu 2012 p. 5997.