It-tieni sessjoni fuq l-ortografija

Posted on by

Fuq talba tal-għalliema, l-Akkademja tal-Malti flimkien mal-uffiċjali edukattivi tal-Malti David Agius Muscat, George Mifsud u David Muscat, bil-kollaborazzjoni tal-kapijiet tad-Dipartiment tal-Malti tal-Iskejjel tal-Knisja Phyllis Debono u Claire Zerafa, organizzaw it-tieni sessjoni ta’ tweġib għal mistoqsijiet dwar problemi fuq l-ortografija tal-Malti.

Din saret fit-18 ta’ Mejju 2012, mill-5.30pm sas-7pm, fiċ-Ċentru tal-Kurrikulu, il-Furjana. Il-kelliem kien is-Sur Carmel Azzopardi, il-President tal-Akkademja tal-Malti.  Tagħrif ieħor u aħbarijiet oħra dwar il-lingwa Maltija jistgħu jinkisbu minn dawn is-siti:

http://malti.skola.edu.mt
http://maltikurja.wordpress.com
http://www.akkademjatalmalti.com

Taqbiliet Popolari

Posted on by

Nirringrazzjaw lis-Sa Michelle Spiteri, il-Kap tal-Iskola Primarja tal-Birgu, tal-Kulleġġ Santa Margerita, li bagħtitilna t-taqbila Marinton Ċiklanton li kienet għallmithielha ommha meta kienet għadha tifla.

Marinton, Ċiklanton,
libsa bajda bil-pantor.
Naħsilhielek, ngħaddihielek,
għall-festa ta’ San Girgor.

Iż-żarbun, iż-żarbun ta’ Severina,
Severina bint ir-re,
daħlet sieqha ġol-gabarrè.

It-taqbila inkludejnieha wkoll f’din il-preżentazzjoni tat-taqbiliet popolari.

Inti taf xi taqbiliet popolari Maltin oħra li mhumiex fiż-żewġ preżentazzjonijiet tat-taqsima “Mogħdija taż-Żmien”, li hemm fil-kolonna tal-lemin tas-sit? Jekk iva, ibgħathomlna ħalli ngħallmuhom lit-tfal tal-iskejjel.

Mistoqsijiet fuq l-Ortografija Maltija 2

Posted on by

Fuq talba tal-għalliema, l-Akkademja tal-Malti flimkien mal-uffiċjali edukattivi tal-Malti David Agius Muscat, George Mifsud u David Muscat, bil-kollaborazzjoni tal-kapijiet tad-Dipartiment tal-Malti tal-Iskejjel tal-Knisja, Phyllis Debono u Claire Zerafa, se jorganizzaw sessjoni oħra ta’ tweġib ta’ mistoqsijiet dwar problemi pendenti fuq l-ortografija tal-Malti.

Din se ssir fit-18 ta’ Mejju 2012, mill-5.30 sas-7.00 ta’ filgħaxija fiċ-Ċentru tal-Kurrikulu, Triq Sarria, il-Furjana, u se titmexxa mis-Sur Carmel Azzopardi.

L-għalliema tal-primarja u s-sekondarja mħeġġin jattendu u jistaqsu fuq l-ortografija Maltija. Napprezzaw ħafna jekk il-mistoqsijiet jintbagħtu minn qabel lis-Sur Azzopardi f’dan l-indirizz ħalli jkun jista’ jitkellem dwarhom dakinhar tat-taħdita. L-għalliema jistgħu jistaqsuh xi mistoqsijiet dak il-ħin ukoll. Is-Sur Carmel Azzopardi huwa l-President tal-Akkademja tal-Malti u kien għalliem tal-Malti għal ħafna snin. Huwa kittieb u jispeċjalizza fl-ortografija Maltija.

L-ewwel sessjoni saret fis-27 ta' April 2012

Kulħadd huwa mistieden jattendi u l-attendenza hija bla ħlas.

Ara wkoll it-tagħrif fuq din l-attività mill-paġna taċ-ċirkularijiet (Ċirkulari 98/2012). Għal tagħrif ieħor u għal aħbarijiet oħra dwar il-lingwa Maltija, tista’ tidħol f’dawn is-siti wkoll:

Il-blogg għall-għalliema tal-Malti tas-sekondarja fl-iskejjel tal-Knisja

L-Akkademja tal-Malti                                            

Id-drawwiet u t-tradizzjonijiet Maltin

Posted on by

Nifirħu lill-għalliema tal-Malti Massabielle Zammit li tgħallem fl-Iskola Sekondarja tas-Subien, Tal-Ħandaq, fil-Kulleġġ San Injazju, tal-lezzjonijiet li għamlet fuq il-ħobż Malti. Dawn il-lezzjonijiet kienu marbuta mal-proġett tad-drawwiet u t-tradizzjonijiet Maltin, li hu parti mis-sillabu tal-ewwel sena tas-sekondarja.

L-għalliema ħadet lill-istudenti tagħha f’forn tal-familja ta’ wieħed mill-istudenti stess f’Ħal Qormi u hemm l-istudenti mhux biss raw kif issir l-għaġina ta’ għamliet differenti ta’ ħobż, imma saħansitra meddew idejhom għax-xogħol.

Lura fil-klassi, l-istudenti ngħataw sett ta’ mistoqsijiet fuq x’raw u x’tgħallmu miż-żjara u mis-sessjoni prattika fil-forn. Dakinhar l-istudenti ġabu l-ingredjenti magħhom mid-dar u għamlu ftira Maltija fil-klassi.

Fl-aħħar lezzjoni fuq l-istess suġġett, l-għalliema qassmet karta tat-taħriġ bir-riċetta tal-ftira li fiha l-istudenti ntalbu jimlew il-vojt bl-ingredjenti li użaw biex għamlu l-ftira u jqiegħdu għadd ta’ sentenzi f’sekwenza skont l-ordni tar-riċetta.

__________________
Jinteressak das-suġġett? Trid taqra aktar dwaru? Ara dil-preżentazzjoni mit-Taqsima Snajja’ Maltin ta’ dan is-sit.

Mużika Tradizzjonali Maltija għall-Iskejjel

Posted on by

Il-festival mużikali Għanafest huwa impenjat li jkompli jsaħħaħ l-apprezzament tal-mużika tradizzjonali Maltija fost it-tfal. Għalhekk nhar il-Ġimgħa, 8 ta’ Ġunju 2012, fid-9.30am l-Għanafest se jippreżenta programm speċjali ta’ għana għall-iskejjel. Dan il-programm jinkludi sessjoni interattiva mal-għannej Joey Grech (ta’ Raħal Ġdid), li se jgħanni spirtu pront fuq temi u suġġetti li jagħżlulu t-tfal stess.

Taqsima popolari oħra hija dik tad-daqq taż-żaqq u t-tanbur, fejn it-tfal jiġu mistiedna fuq il-palk biex jitħarrġu fid-daqq tat-tanbur. Se jindaqqu wkoll prejjem Maltin addattati għat-tfal.

L-istudenti huma mħeġġa jipparteċipaw. Il-programm se jkun ippreżentat minn Francesca Zarb, tfajla ta’ 17-il sena li hi magħrufa mat-tfal Maltin. Kull min jattendi jingħata materjal informattiv li jista’ jintuża għall-proġetti tal-iskola.

Ma jonqosx ukoll biljett kumplimentari għat-tliet serati tal-festival.

Ara wkoll it-tagħrif fuqha mill-paġna taċ-ċirkularijiet (Ċirkulari 94/2012).