L-Għaqda tal-Malti – Università se torganizza attività oħra fis-serje filMalti, din id-darba biex tfakkar l-20 sena mill-mewt tad-drammaturgu Francis Ebejer. F’din l-attività se jintwerew siltiet mill-filmat tad-dramm Il-Ġaħan ta’ Binġemma, ta’ Francis Ebejer, u li fih tispikka t-tema tal-kontinwità. Id-diskussjoni li ssegwi se tiffoka fuq din it-tema (li tispikka wkoll fir-rumanzett għall-eżami taċ-ĊES, Il-Ħarsa ta’ Rużann). Din se titmexxa minn Dr Joseph Axiaq.

Minħabba r-rabta ta’ Francis Ebejer ma’ Ħad-Dingli, din l-attività se ssir fis-sala tal-Kulleġġ Savio fid-29 ta’ Novembru 2013 mill-5 sat-8 ta’ filgħaxija. Din l-attività hi ta’ interess partikulari għall-għalliema tas-sekondarja, għall-istudenti u għall-ġenituri tagħhom.

Tagħrif ieħor tistgħu tiksbuh mill-paġna tal-Facebook tal-Għaqda tal-Malti.

Nafu li bosta skejjel organizzaw attivitajiet differenti f’Jum Dun Karm, il-Poeta Nazzjonali tal-Maltin. Aħna rċivejna ritratti mill-Iskola Sekondarja tas-Subien, Tal-Ħandaq tal-Kulleġġ San Injazju, mill-Iskola Primarja ta’ Ħal Għaxaq tal-Kulleġġ San Benedittu, mill-Iskola Sekondarja tal-Bniet, l-Imrieħel tal-Kulleġġ Santa Tereża, u mill-Iskola Primarja tar-Rabat tal-Kulleġġ San Nikola.

Ħajr u prosit lill-għalliema kollha u lill-assistenti kapijiet u kapijiet ta’ skejjel differenti li organizzaw dawn l-attivitajiet, partikolarment lil Ina Cutajar, Jacqueline Darmanin, Rita Dapi Vella, Saviour Sammut, Deo Grech, u Jonathan Portanier Mifsud li bagħtulna dawn ir-ritratti.

Fit-18 ta’ Ottubru li għadda d-Direttorat għal Kwalità u Standards fl-Edukazzjoni u l-Kumitat Festi Nazzjonali tellgħu attività f’ġieħ il-Poeta Nazzjonali tal-Maltin ħdejn il-monument tiegħu l-Furjana.

F’din l-attività tkellmu d-Direttur Ġenerali l-Professur Grace Grima u l-Ministru tal-Edukazzjoni u x-Xogħol Evarist Bartolo. It-tnejn faħħru lil Dun Karm bħala poeta kbir Malti li ħadem ħafna għal ilsien art twelidna. Fiċ-ċerimonja l-kantanta Mary Rose Malli kantat żewġ poeżiji ta’ Dun Karm, ‘Wied Qirda’ u ‘Bjuda’, bil-mużika tas-Surmast Dominic Galea. Iċ-ċerimonja ntemmet bit-tqegħid tal-fjuri mit-tfal tal-iskejjel mal-monument tal-Poeta. Il-preżentazzjoni kienet f’idejn il-Kap tad-Dipartiment tal-Malti, Ina Cutajar.

Nirringrazzjaw lil dawn l-iskejjel li ġew għall-attività: l-Iskola Primarja tal-Furjana, tal-Kulleġġ San Ġorġ Preca, l-Iskola Primarja taż-Żejtun, tal-Kulleġġ Santa Margerita, l-Iskola Sekondarja ta’ Ħaż-Żebbuġ, tal-Kulleġġ San Ġorġ Preca, l-Iskola Sekondarja tal-Imrieħel, tal-Kulleġġ Santa Tereża, l-Iskola Sekondarja tan-Naxxar, tal-Kulleġġ San Nikola, l-Iskola Sekondarja ta’ Pembroke, tal-Kulleġġ Sant Klara, l-Iskola Sekondarja tal-Mosta, tal-Kulleġġ Marija Reġina, l-Iskola Sekondarja Ogħla, Giovanni Curmi, l-Iskola tas-Sacred Heart, l-Iskola Sekondarja ta’ St Joseph, Tas-Sliema, l-Iskola Sekondarja tas-Seminarju, il-Kulleġġ Santu Wistin, u l-Iskola Sekondarja ta’ Santa Venera, tal-Kulleġġ Santa Tereża.

L-album tal-attività tista’ tarah minn hawn.