Staqsini u nwieġbek fuq l-ortografija

Posted on by

Id-Dipartiment tal-Malti u l-Akkademja tal-Malti qed jorganizzaw taħdita għall-għalliema tal-primarja u tas-sekondarja fuq id-diffikultajiet li jista’ jkollhom fuq l-ortografija tal-Malti.

L-attività se jmexxiha Dr George Farrugia, lettur tal-Malti fl-Università ta’ Malta.

It-taħdita se ssir nhar it-2 ta’ Mejju 2014 mill-5.00 sas-6.30 ta’ filgħaxija, fiċ-Ċentru Nazzjonali tal-Kurrikulu (National Curriculum Centre), il-Ħamrun.

Napprezzaw ħafna jekk id-diffikultajiet li għandkom fuq l-ortografija tibagħtuhom minn qabel lil Dr George Farrugia ħalli jkun jista’ jitkellem dwarhom dakinhar tat-taħdita. L-għalliema jistgħu jistaqsuh mistoqsijiet dak il-ħin ukoll.

Id-dħul huwa b’xejn.

Tagħrif ieħor issibuh f’din iċ-ċirkulari.

Kors fil-kompetenzi ewlenin

Posted on by

Fis-17, it-18 u d-19 ta’ Frar organizzajna kors ta’ aġġornament fil-kompetenzi ewlenin fit-tagħlim tal-Malti.

Attendew għadd ta’ għalliema minn skejjel differenti u l-kelliema taw tagħrif fuq kif nistgħu ngħallmu lil studenti li għandhom bżonnijiet speċjali fil-litteriżmu.

Min ikollu diffikultà jew ikun jixtieq jaqsam l-esperjenza tiegħu magħna, nitolbuh jikkuntattjana.

L-Ambaxxaturi tal-Qari fl-Iskola Primarja ta’ Ħal Għaxaq

Posted on by

Il-Ġimgħa, 31 ta’ Jannar 2014, l-Iskola Primarja ta’ Ħal Għaxaq laqgħet fil-klassijiet tagħha ħames mistednin speċjali. Dawn kienu l-Ambaxxaturi tal-Qari Claire Agius Ordway, Kurt Calleja, Keith Demicoli, Jessica Muscat u l-Ministru tal-Edukazzjoni, Evarist Bartolo.

L-Ambaxxaturi tal-Qari qraw  storja bil-Malti u oħra bl-Ingliż lit-tfal tal-Ewwel, it-Tieni u t-Tielet Sena. Wara, il-Klabb tal-Qari tal-istess skola organizza forum fuq il-qari fis-sala tal-iskola. Fih ħadu sehem it-tfal tar-Raba’, il-Ħames u s-Sitt Sena tal-istess skola, il-Ministru tal-Edukazzjoni, l-Ambaxxaturi tal-Qari, il-Professur Charles Mifsud, il-Prinċipal tal-Kulleġġ u l-Uffiċjali Edukattivi tal-Malti u l-Ingliż. L-attività ntemmet b’żewġ kanzunetti ta’ Jessica Muscat u Kurt Calleja.

 

Taqbila – għanjiet tat-tfal

Posted on by

taqbilaId-diska kompatta Taqbila fiha 17-il poeżija ta’ poeti Maltin magħrufa, fosthom Dun Karm, Anton Buttigieg, Karmenu Vassallo, Ġorġ Pisani u Patri Anastasju Cuschieri. Il-mużika għall-poeżiji nkitbet minn Mro Dominic Galea. Dawn imbagħad tkantaw mit-tfal tal-Kor Mirabitur immexxi minn Simone Attard.

Din is-CD qed titqassam lil kull għalliem/a tal-iskejjel primarji tal-istat mill-Uffiċjali Edukattivi tal-Malti tul din is-sena skolastika (2013-2014) u tul is-sena li ġejja (2014-2015).

L-għalliema jistgħu jiksbu wkoll xi karti tat-taħriġ u logħob marbut mal-istess għanjiet mis-sit elettroniku qawsalla.com. Tagħrif ieħor issibu minn din iċ-ċirkulari.

Films oriġinali mnebbħa mill-poeżiji tas-Sekondarja

Posted on by

Ftit tal-jiem oħra, l-għalliema tal-Malti u l-istudenti tal-Ewwel u t-Tieni Sena tas-Sekondarja se jkunu jistgħu jaraw fuq l-iskrins tal-kompjuters tagħhom u l-bords interattivi films qosra mnebbħa mill-poeżiji li hemm fis-sillabu tal-Malti. Dan kollu sar possibbli bis-saħħa ta’ proġett innovattiv li għaddej bejn l-Istitut tal-Arti u d-Disinn tal-MCAST u l-Uffiċjali Edukattivi tal-Malti tad-Dipartiment tat-Tmexxija tal-Kurrikulu fi ħdan il-Ministeru tal-Edukazzjoni.

Nirringrazzjaw lill-istudenti tal-Midja tal-Istitut tal-Arti u d-Disinn, lil-lettur tagħhom Ian Attard, lid-Direttur tal-Istitut Stephen Vella u lill-Assistenti Diretturi Melanie Mizzi u Mark Theuma tas-sehem tagħhom.

Jekk intom interessati f’dan il-proġett, iktbu lill-Uffiċjal Edukattiv David Muscat. Sadattant, tistgħu taraw b’għajnejkom stess x’inhu jsir billi ssegwu, minn hawn taħt, iż-żewġ siltiet mill-ewwel żewġ poeżiji li qed naħdmu fuqhom.

L-ewwel film imnebbaħ mill-poeżija ‘Il-Barri’ ta’ Ġorġ Pisani
 

It-tieni film imnebbaħ mill-poeżija ‘Wied Qirda’ ta’ Dun Karm