Għadha kemm ħarġet il-lista uffiċjali tal-qari supplimentari tal-Malti fil-Primarja. Din naġġornawha kull sena.

Bħas-snin ta’ qabel, din is-sena reġa’ twaqqaf bord ta’ għalliema, edukaturi u esperti fil-qasam tal-kotba għall-Primarja, biex jaġġorna l-lista tal-kotba tal-qari supplimentari għall-klassijiet kollha tal-Primarja.

Il-Bord għamel l-għażla tiegħu skont din iċ-ċekkjatura tal-kotba tal-qari supplimentari.

Il-Kapijiet tal-Iskejjel għandhom jikkunsidraw l-aħjar mod kif din il-lista tingħata wkoll lill-ġenituri biex jgħinu lil uliedhom jagħżlu jew jixtru l-aħjar kotba tal-qari mil-libreriji jew mill-ħwienet tal-kotba.

Il-lista aġġornata tista’ taraha minn din iċ-ċirkulari.

Nirringrazzjaw u nifirħu lill-għalliema msemmija hawn taħt tar-riżorsi li bagħtulna tul ix-xahar ta’ Ottubru 2012 biex jittellgħu f’dan is-sit.

Louise Chircop, l-Iskola Primarja tal-Imtarfa.

Graziella Micallef, l-Iskola Primarja ta’ Birkirkara.

Paul Anthony Rapa, l-Iskola Primarja ta’ Ħal Lija.

Marilyn Saliba, l-Iskola Sekondarja tal-Bniet, il-Mosta.

Claire Sammut, l-Iskola Primarja tar-Rabat, Malta.

Anton Spiteri, l-Iskola Primarja tal-Mosta B.

Vincienne Zammit, l-Iskola Sekondarja tas-Subien, Santa Venera.

Prosit lill-Iskola Primarja ta’ Ħal Lija, tal-Kulleġġ Santa Tereża, għat-tnedija ta’ ktieb mill-isbaħ!

Dan il-proġett beda b’avventura wara li l-Iskola Primarja ta’ Ħal Lija nawgurat kamra tal-qari u l-kitba. Mill-attivitajiet ta’ ġol-kamra u l-klassijiet l-oħra ħareġ dan il-ktieb ikkulurit li jqanqal l-immaġinazzjoni sa mill-ewwel dehra tiegħu.

Il-kitbiet, kif ukoll it-tpinġijiet li jakkompanjawhom, saru mill-istudenti ċkejkna ta’ din l-iskola, bil-gwida tal-għalliema, il-kap tal-iskola, l-assistenti kapijiet u l-awtur Trevor Zahra.

It-tema hija waħda fantastika msejsa fuq sfond ta’ ġungla. L-ispunt għall-kitbiet kienu l-ħitan impittra ta’ din il-kamra fl-iskola. Il-ktieb huwa bilingwi. Hemm siltiet bil-Malti u oħrajn bl-Ingliż. L-istil tal-kitbiet ivarja u tvarja wkoll l-età tal-awturi ċkejknin tiegħu.

Dan il-ktieb jista’ jservi ta’ punt ta’ tluq għal numru ġmielu ta’ eżerċizzji fil-klassi u lil hinn minnha.

Minn qalbna nifirħu lill-protagonisti ta’ dan il-proġett, lill-istudenti li ħolqu dawn il-kitbiet mill-isbaħ,  kif ukoll lill-għalliema u lil dawk kollha li taw sehemhom biex dan il-proġett jirnexxi.

Awguri!