Issa li wasalna f’nofs is-sena skolastika, nixtiequ nirringrazzjaw lil dawk l-għalliema li minn żmien għal żmien għoġobhom jaqsmu r-riżorsi maħluqa minnhon ma’ għalliema oħra li jużaw dan is-sit. Nixtiequ wkoll li dan is-sit iservi ta’ vetrina għax-xogħol u l-prattiċi tajbin li ħafna għalliema tal-Malti fis-sekondarji, kif ukoll għalliema fil-primarji, ikunu qegħdin iħaddmu fl-iskejjel rispettivi tagħhom. Għalhekk jekk wieħed iżur is-sezzjoni ta’ dan is-sit Vetrina, se jkun jista’ jara ritratti marbutin ma’attivitajiet ta’ tagħlim kif ukoll esibizzjonijiet li jippromwovu x-xogħol tal-istudent. L-għan huwa li naqsmu ideat ta’ kif jista’ jiġi esibit ix-xogħol tal-Malti tal-istudent, li ngħinu sabiex jinħoloq ambjent isbaħ għall-klassi fejn isir it-tagħlim tal-Malti u jimmotiva lill-istudent, kif ukoll sabiex iħeġġeġ għalliema oħra jaqsmu magħna l-prattiċi u l-ideat tajbin fejn jidħol it-tagħlim tal-Malti. Għalkemm ħafna mir-ritratti jitkellmu waħedhom, oħrajn huma marbutin ma’ pedagoġija li se nkunu qegħdin nispjegawha fil-qosor.

Numru ta’ riżorsi bit-tema tat-temp, l-istaġuni u l-ħwejjeġ għat-tagħlim tal-Malti għall-Barranin minn Stephanie Dempsey mill-Iskola Sekondarja fil-Kulleġġ t’Għawdex.

Numru ta’ riżorsi għat-tagħlim tal-Malti għall-Barranin minn studenti fil-Kors tal-Edukazzjoni fl-Universita’ ta’ Malta b’kollaborazzjoni mal-għalliema tal-Malti tal-Iskola Medja fil-Kulleġġ Marija Reġina, In-Naxxar.

Dawn ir-riżorsi jinkludu t-testi li jridu jinqraw mill-għalliema, kif ukoll il-mistoqsijiet għall-istudenti li jistgħu jsiru jew fuq karti tat-taħriġ jew b’mod interattivi. Is-siltiet għandhom isiru skont is-sekwenza tan-numri. Nirringrazzjaw lil Josette Baldacchino li ħejjiet dawn ir-riżorsi.

Għaxar filmati b’interpretazzjoni ta’ wħud mill-poeżiji fl-antoloġija Bejn Ħaltejn u li huma inklużi fis-sillabu taċ-ĊES.

Poeżiji tar-Raba’ Sena:

• Refuġjata
• Lill-Qamar Kwinta
• Passaġġi
• Quo Vadis?
• Niftakar
• Jien
• Jum San Valentin
• B’Idejna

Poeżji tal-Ħames Sena:

• Fejn Jorqod ir-Riħ
• Żagħżugħ ta’ Dejjem

Dawn il-filmati huma xogħol l-istudenti tal-Istitut tal-Arti Kreattiva tal-MCAST. Proġett bi sħab bejn l-MCAST u d-Dipartiment tal-Kurrikulu tal-Ministeru tal-Edukazzjoni u x-Xogħol.