Fit-28 ta’ Mejju 2012, fl-Iskola Sekondarja tal-Bniet tal-Imrieħel, il-Prinċipal tal-Kulleġġ Santa Tereża, Dr Frank Fabri, nieda l-ktieb Tmexxija Effettiva ta’ Skejjel f’Kulleġġi – Kunsiderazzjonijiet f’Kuntest ta’ Bidla. Dan huwa l-ewwel ktieb bil-Malti li jiddiskuti u jirrifletti fuq it-tmexxija tal-iskejjel f’kulleġġi f’Malta.
Nifirħu lill-awtur tal-analiżi mirquma li għamel u talli għaraf ikompli jħaddem b’tant għaqal u ħila l-lingwa Maltija fl-għalqa edukattiva. Prosit tassew!
Nixtiequ nifirħu u nroddu ħajr lill-għalliema tal-Iskola Primarja tar-Rabat, is-Sa Claire Sammut tar-riżorsi sbieħ u interessanti li qed toħloq għat-tagħlim tal-Malti fil-primarja. Waħda mir-riżorsi tajbin għas-sitt sena tal-primarja fuq il-verbi trilitteri u kwadrilitteri ssibuha minn hawn.
Inħeġġu lill-għalliema joħolqu riżorsi simili bil-kompjuter jew b’mezzi oħra, fosthom għall-bord intelliġenti u jgħadduhomlna ħalli nkattru l-għadd ta’ riżorsi li qed intellgħu f’dan il-bank ta’ riżorsi. Tajjeb infakkru lil kull min jinqeda b’dawn ir-riżorsi biex jirrispetta d-drittijiet tal-awturi.
Nixtiequ naraw li t-tfal kollha jkunu jafu jgħidu n-numri bil-Malti, kif jixraq. Għaldaqstant inħeġġukom trawmuhom jibdew jgħoddu bil-Malti sa minn età bikrija.
Hawnhekk għandkom xi riżorsi li tistgħu tużaw fil-kinder u fl-ewwel snin tal-primarja.
Nawguraw l-Għid it-tajjeb lill-għalliema kollha.
George Mifsud, David Agius Muscat, David Muscat
L-Uffiċjali Edukattivi tal-Malti
chezus.com
Bħalissa qed naraw li l-kittieba ħabrieka tal-Malti qegħdin jimirħu fid-dinja tal-pubblikazzjoni elettronika. Sa issa nafu li hemm erba’ kotba elettroniċi bil-Malti.
Dan huwa ta’ pjaċir kbir għalina u għaldaqstant inħeġġu lill-kittieba tal-Malti biex ikomplu jirregalaw lit-tfal Maltin stejjer sbieħ bi lsienna. U nħeġġu lilkom ukoll, għeżież għalliema u ġenituri, biex tkomplu tħeġġu lit-tfal jaqraw stejjer miktubin bl-ilsien sabiħ tagħna.