Nifirħu lit-tfal tar-Raba’ Sena tal-Iskola Primarja ta’ Ħad-Dingli, immexxija mis-Sur Mark Saliba tal-attività tassew sabiħa li tellgħu f’ġieħ Dun Karm fit-18 ta’ Ottubru 2012.
Inħeġġu lill-għalliema tal-iskejjel Primarji jkomplu jorganizzaw attivitajiet sbieħ bħal dawn u jgħarrfuna bihom.
TAĦDITA PUBBLIKA FUQ DE SOLDANIS
Nhar it-Tlieta, 30 ta’ Ottubru 2012 se ssir taħdita fil-Bibljoteka Nazzjonali ta’ Malta, b’rabta ma’ de Soldanis, fuq l-istorja, il-pitturi, l-ikel, l-ilbies, id-dizzjunarju u l-pronunzja.
Il-kelliema se jkunu l-Prof. Frans Ciappara, il-Prof. Keith Sciberras, Kenneth Gambin, Claire Bonavia, Rosabelle Carabott u Janica Magro.
Min jiġi jingħatalu ktejjeb bil-kulur fuq de Soldanis, ideali għall-istudenti tas-Sekondarja.
It-taħdita se ddum siegħa u nofs (mis-6.30pm sat-8pm) u d-dħul għaliha b’xejn.
Ara t-tagħrif fuq din l-attività minn hawn.
————————
KTIEB FUQ DE SOLDANIS GĦAS-SEKONDARJA
Il-ktieb ta’ de Soldanis għall-istudenti tas-sekondarja tnieda fl-24 ta’ Ottubru fil-Ministeru ta’ Għawdex. Ara l-istqarrija u r-ritratti tat-tnedija.
Minn hawn tista’ tniżżel kopja pdf tal-ktieb. Dawn huma t-tweġibiet tat-taħriġiet li ssib fl-istess ktieb u kopja tat-tmien djalogi ta’ de Soldanis.
Bħal kull sena, f’Ottubru nfakkru l-Poeta Nazzjonali tagħna Dun Karm Psaila. Din is-sena se nfakkruh f’nhar twelidu, il-Ħamis 18 ta’ Ottubru.
Dakinhar għadd ta’ studenti flimkien mal-għalliema tagħhom, minn skejjel differenti, se jiltaqgħu ħdejn il-monument ta’ Dun Karm, il-Furjana, fejn se jkun hemm attività organizzata mid-Dipartiment tal-Kurrikulu u t-Tagħlim Elettroniku u l-Kumitat Festi Nazzjonali.
Ikun jixraq li dakinhar tfakkru lill-Poeta Nazzjonali fil-lezzjonijiet tagħkom u fil-laqgħat ta’ filgħodu fl-iskejjel. Nistednukom tużaw il-bijografija u l-preżentazzjoni (ppt) b’ritratti ta’ Dun Karm li ssibuha fit-taqsima “Jum Dun Karm” f’dan is-sit.
Ara wkoll din iċ-ċirkulari u r-ritratti tal-okkażjoni meħuda mid-Dipartiment tal-Informazzjoni.
Din is-sena jaħbat it-300 anniversarju mit-twelid tal-Kanonku Ġan Piet Franġisk Agius de Soldanis (1712-1770). Kien l-ewwel wieħed li xandar kemm felaħ fuq l-ilsien Malti u kiteb fuq l-istorja, ir-reliġjon u l-kultura tal-Maltin.
Se tiftaħ wirja fuqu l-Bibljoteka Nazzjonali, il-Belt. Id-dati tal-wirja huma:
mit-22 sas-26 ta’ Ottubru, u
mit-12 sas-16 ta’ Novembru.
Fil-wirja qed jiġu ppreżentati l-manuskritti ta’ de Soldanis, xi sejbiet arkeoloġiċi li semma f’xogħlijietu, u pitturi marbutin ma’ xogħlijietu.
L-għalliema mħeġġin jieħdu lill-istudenti tar-raba’ sena tas-sekondarja. Tistgħu tinkitbu għall-wirja billi tikkuntattjaw direttament lis-Sa Joanne Sciberras.
Ktejjeb b’xejn għall-istudenti tar-Raba’ Klassi tas-Sekondarja
L-istudenti tar-raba’ sena tas-sekondarja li jattendu l-wirja jingħatalhom ktejjeb b’xejn fuq de Soldanis. Barra li miktub b’mod mexxej u mżewwaq b’pitturi tal-epoka, fih it-taħriġiet u d-djalogi ta’ de Soldanis. Ideali għat-tħejjija tal-eżami taċ-ĊES
Intervisti u qari fuq il-YouTube
Min jixtieq isemma’ l-għaxar djalogi sbieħ ta’ de Soldanis lill-istudenti, kulma jrid jagħmel hu li jidħol fil-YouTube u jittajpja “De Soldanis”. Barra d-djalogi, jista’ jsemmgħalhom xi waħda mill-40 intervista ma’ storiċi u lingwisti fuq de Soldanis. Jista’ wkoll isemmgħalhom id-daħla tad-dizzjunarju.
Tista’ tidħol direttament fl-istazzjon tal-YouTube fejn hemm dawn ir-riżorsi kollha minn hawn.
B’rabta ma’ dan
Ara l-istqarrija tal-Ministeru għal Għawdex u xi ritratti tal-wirja (DOI).
Ara wkoll l-istqarrija tat-tnedija tal-ktieb tas-sekondarja u xi ritratti tal-istess attività (DOI).
Ħajr lill-Ministeru għal Għawdex, il-Libreriji Maltin, Heritage Malta u d-Dipartiment tal-Malti tal-Università, li qed jikkollaboraw fil-proġett. Prosit ta’ din l-inizjattiva sabiħa.
F’għeluq il-50 sena minn mewt il-poeta Anastasju Cuschieri, se ssir taħdita organizzata mid-Dipartiment tal-Malti tal-Università u mill-Għaqda tal-Malti – Università.
Din se ssir l-Erbgħa, 24 t’Ottubru fis-7:30pm fil-Librerija tal-Università. Fiha se jkunu qed jitkellmu Rev. Dr. Charlò Camilleri u Dr Josette Attard, kif ukoll is-Sur Charles Coleiro li kien jaf lill-poeta mill-qrib.
Għal aktar tagħrif, tistgħu tidħlu hawn.
