Minn Olvin Vella
Kif niktbuh il-plural ta’ ragħaj: ragħajja jew rgħajja?
Il-plural huwa ragħajja, u l-mudell qarrejja. Ftakar biss li ma nistgħux nirduppjaw l-għ fil-kitba.
Ara dawn l-eżempji bil-mudell imħaddem:
| Il-qarrej jaqra. | Il-qarrejja taqra. | Il-qarrejja jaqraw. |
| Ir-ragħaj jirgħa. | Ir-ragħajja tirgħa. | Ir-ragħajja jirgħaw. |
Innota li fl-antik, meta l-għ kien għad kellha l-ħoss tagħha, kienu jiktbuha ragħgħaj. U l-plural kien ragħgħajja.
Kemm kienu jitkellmu differenti!
Taħdita interessanti nhar is-Sibt, l-1 ta’ Diċembru 2012
L-għalliema tal-Malti, u kull min huwa interessat, mistiedna jattendu għal taħdita mogħtija mis-Sur Olvin Vella, lettur tal-Malti fl-Università ta’ Malta, fuq kemm kienu jitkellmu Malti differenti l-Maltin fl-antik. Fost l-oħrajn Vella se jitkellem fuq il-konsonanti li tlifna fi żminijiet differenti.
B’kollox tlifna seba’ ħsejjes – tnejn biss salvajniehom fil-kitba: l-għajn u l-akka. Il-ħames konsonanti l-oħra nsibuhom miktubin fil-prietki u fit-talb maġiku, fl-atti tan-nutara u fil-proċessi tal-Inkwiżitur.
It-taħdita se ssir is-Sibt li ġej, l-1 ta’ Diċembru, f’Palazzo Santa Sofia (ftit passi ’l bogħod minn Palazzo Falson, l-Imdina) fl-10.30am. Id-dħul huwa b’xejn imma l-postijiet huma limitati.
Tagħrif ieħor jista’ jinkiseb minn info@palazzofalson.com
Olvin Vella jgħallem l-istorja tal-ilsien Malti, l-Università. Editja xogħlijiet fuq de Soldanis u Vassalli, u jirriċerka l-istorja tal-eqdem kitbiet bil-Malti u l-formazzjoni tal-Malti Standard. Huwa membru attiv tal-Kunsill Nazzjonali tal-Ilsien Malti u jaħdem ħafna b’risq ilsienna.
Tellajna xi riżorsi biex tużawhom fil-klassi fuq il-bord interattiv. Għandkom l-aktar annimali popolari mat-tfal – kemm dawk li nsibu madwarna, kif ukoll dawk li narawhom fuq it-televixin. Qegħdin maqsumin f’sillabi biex it-tfal jitgħallmu jaqrawhom sew.
Il-preżentazzjonijiet tal-annimali tistgħu ssibuhom fit-taqsima tal-kinder u fit-taqsima tal-ewwel sena tal-primarja, flimkien ma’ riżorsi oħrajn.
L-għalliema tal-Malti tal-ewwel u t-tieni sena tas-sekondarja huma mistiedna jieħdu nota taċ-ċirkulari nru 210/2012 u 214/2012.
Iċ-ċirkulari 210/2012 hi dwar in-novelli u d-drammi għas-sillabi tal-ewwel u t-tieni sena tas-sekondarja, filwaqt li ċ-ċirkulari 214/2012 tispjega kif se jsiru l-karti tal-eżami tal-Malti ta’ nofs is-sena tal-ewwel sentejn tas-sekondarja.
Għadha kemm ħarġet il-lista uffiċjali tal-qari supplimentari tal-Malti fil-Primarja. Din naġġornawha kull sena.
Bħas-snin ta’ qabel, din is-sena reġa’ twaqqaf bord ta’ għalliema, edukaturi u esperti fil-qasam tal-kotba għall-Primarja, biex jaġġorna l-lista tal-kotba tal-qari supplimentari għall-klassijiet kollha tal-Primarja.
Il-Bord għamel l-għażla tiegħu skont din iċ-ċekkjatura tal-kotba tal-qari supplimentari.
Il-Kapijiet tal-Iskejjel għandhom jikkunsidraw l-aħjar mod kif din il-lista tingħata wkoll lill-ġenituri biex jgħinu lil uliedhom jagħżlu jew jixtru l-aħjar kotba tal-qari mil-libreriji jew mill-ħwienet tal-kotba.
Il-lista aġġornata tista’ taraha minn din iċ-ċirkulari.