Dan l-aħħar iltaqjna mal-ġenituri tal-istudenti ta’ żewġ skejjel primarji. Tkellimna magħhom fuq ir-regoli tal-Malti u fuq diffikulatjiet li huma jsibu meta jkunu qed jgħinu lil uliedhom fix-xogħol tad-dar tal-Malti. Nirringrazzjaw lill-ġenituri li ġew u li tant ipparteċipaw b’entużjażmu. Kien ta’ pjaċir kbir għalina li niltaqgħu magħhom.
Nirringrazzjaw ukoll liż-żewġ kapijiet ta’ dawn l-iskejjel, is-Sa Rita Azzopardi mill-Iskola ta’ Santa Venera tal-Kulleġġ Santa Tereża, u lis-Sur Lorian Busuttil Naudi mill-Iskola tal-Fgura B tal-Kulleġġ San Tumas More.
Mistoqsija u Tweġiba 33
Minn Olvin Vella
X’niktbu: bżonnjuż jew bżonjuż?
Ikteb bżonjuż, b’n waħda.
Biex nirraġunaw għala, irridu bilfors nagħmlu referenza żgħira għat-Taljan. L-erba’ kelmiet li ġejjin jispiċċaw -nn fil-Malti, imma fit-Taljan insibuhom miktubin bil-gn:
| It-Taljan | Il-Malti |
| bisogno | bżonn |
| disegno | disinn |
| degno | denn |
| impegno | impenn |
Meta dan il-kliem fil-Malti nżidulu suffiss li miegħu jitlob j, ngħidu aħna s-suffiss tal-plural i, inwaqqgħu waħda mid-doppja n: disinji, denji, impenji.
Fil-mistoqsija li saritilna, is-suffiss uż jitlobna nżidulu miegħu j, u għalhekk nerġgħu nwaqqgħu waħda mid-doppja n: bżonjuż.
Eżempji oħra huma: iddisinjat, impenjat.
Dan l-argument japplika wkoll għall-kliem li jispiċċa –ll u li fit-Taljan insibuh miktub bil-gl:
| It-Taljan | Il-Malti |
| sbaglio | żball, żbalji, żbaljat |
| dettaglio | dettall, dettalji, dettaljat |
Kors fil-Kitba bil-Malti
Jekk tixtieq ittejjeb il-kitba tiegħek bil-Malti, ix-xahar id-dieħel se jerġa’ jiftaħ il-Kors fil-Qari tal-Provi. Din is-sena se jkun offrut f’Malta u f’Għawdex ukoll. L-Għawdxin li jixtiequ jirfinaw l-ortografija tagħhom inħeġġuhom biex jaħtfu din l-opportunità u japplikaw għall-kors ta’ Għawdex.
L-applikazzjonijiet miftuħin bħalissa u jintlaqgħu matul il-perjodu regolari sa nhar il-Ġimgħa, 18 ta’ Jannar. Wara, jibqgħu jintlaqgħu bil-kundizzjonijiet tal-applikazzjonijiet tard.
Dan il-kors universitarju, part-time, hu twil sena u huwa organizzat mid-Dipartiment tal-Malti fl-Università flimkien mal-Kunsill Nazzjonali tal-Ilsien Malti. Il-lezzjonijiet tiegħu jsiru darbtejn fil-ġimgħa. Il-kors mhuwiex biss għall-għalliema tal-Malti imma għal kull min juża l-Malti f’xogħlu jew jinteressah dan il-qasam tal-lingwa.
Għal aktar dettalji ara din iċ-ċirkulari u idħol hawn.
L-alfabett Malti kantat
L-għalliema u l-ġenituri kienu ilhom jistaqsuna għall-alfabett Malti kantat. Bis-saħħa tal-Iskola Primarja San Franġisk ta’ Birkirkara issa għandna verżjoni sabiħa tal-alfabett tagħna kantat mill-kor tat-tfal Ilħna Ferrieħa tal-istess skola.
L-idea oriġinali tal-proġett kienet tal-Kap tal-Iskola Sr Giovannita Briffa. Il-kliem tal-kanzunetta huwa ta’ Pauline Spiteri u ta’ Sr Giovannita stess. Il-mużika kitbitha Pauline Spiteri. Il-kanzunetta ġiet irrekordjata minn Andrew Zammit f’Tone Studios, Birkirkara.
Nirringrazzjaw lill-ħbieb tagħna Thomas Pace, id-Direttur tal-Kunsill tal-Malti, u lil Maria Azzopardi, għalliema fl-Iskola Primarja San Franġisk tal-Imsida, li għamlu l-filmati li qed jidhru mal-kanzunetta.
Nirringrazzjaw ukoll lil Tania Mangion, Uffiċjal Edukattiv tas-Snin Bikrin, li għarrfitna b’din il-kanzunetta sabiħa.
Nistidnukom issemmgħu u turu din il-kanzunetta lit-tfal iż-żgħar biex jitgħallmu b’mod divertenti l-alfabett tagħna.
L-ALFABETT MALTI (ittri żgħar)
L-ALFABETT MALTI (ittri kbar)
Il-Milied it-Tajjeb!
Dal-Milied se jkun wieħed speċjali fil-klassijiet tal-primarja. U dan bis-saħħa ta’ Sr Giovannita Briffa, il-Kap tal-Iskola San Franġisk ta’ Birkirkara, li għadditilna kanzunetta ħelwa ħafna tal-Milied miktuba minn Mario Cucciardi, bil-mużika ta’ Andrew Zammit. Il-kanzunetta hija kantata mill-kor tat-tfal ‘Ilħna Ferrieħa’ tal-istess skola u ġiet irrekordjata għand Tone Studios. Nirringrazzjaw lill-ħbieb tagħna Thomas Pace u Maria Azzopardi li għal darb’oħra ħejjew il-filmat ta’ mal-kanzunetta.
Min irid aktar tagħrif fuq din il-kanzunetta u fuq kanzunetti oħra bil-Malti ta’ dan l-istess kor jista’ jidħol fis-sit tal-Iskola San Franġisk.
Nixtiqulkom il-Milied it-tajjeb u nħeġġukom biex tkantaw din il-kanzunetta fil-klassijiet tagħkom.