Data:
29/07/2010; Kategorija:
Varji;
Nagħtikom merħba f’dan il-blogg tal-Malti. Konna ilna naħsbu biex noħolqu din l-għodda elettronika għalikom l-għalliema tal-primarja biex mhux biss tkunu informati bl-aħħar tagħrif fuq dak kollu li għandu x’jaqsam mal-Malti, imma jkollkom ukoll riżorsi differenti biex tieħdu ideat minnhom u tużawhom fil-klassijiet tagħkom.
Huwa għalhekk li ddeċidejna li nsemmu dan il-blogg “Il-Bank tar-Riżorsi tal-Malti”. Ir-riżorsi ssibhom mill-menù ta’ fuq u mit-taqsimiet tal-ġenb.
Imma ma nistgħux nibnu bank ta’ riżorsi jekk inti wkoll ma tagħtix sehmek. Jekk għandek xi materjal li tixtieq taqsmu magħna, nitolbuk tgħaddihulna, u jidher f’ismek. Iktar ma jkollna materjal, iktar ikollna riżorsi differenti li nkunu nistgħu nużawhom mal-istudenti ta’ livelli differenti.
Jekk għandek xi kumment jew tixtieq tiltaqa’ magħna, iktbilna.
David Agius Muscat
Uffiċjal tal-Edukazzjoni għall-Malti
Iċ-Ċentru tal-Kurrikulu
Triq Sarria
Il-Furjana FRN 1460
Tel. (+356) 2558 7101
Data:
29/07/2010; Kategorija:
Avviżi;
Sejħa għal kotba ġodda tal-lingwa Maltija għat-3 u r-4 Sena tal-Primarja
Id-Direttorat għal Kwalità u Standards fl-Edukazzjoni ħareġ avviż fil-Gazzetta tal-Gvern (tal-14 ta’ Mejju 2010, nru 18,593, p. 4185) għal sottomissjoni ta’ kotba tal-lingwa Maltija tat-3 u tar-4 Sena tal-Primarja. Is-sejħa tagħlaq il-Ħamis, it-3 ta’ Ġunju 2010.
Kotba ġodda tal-lingwa Maltija għall-5 u s-6 Sena tal-Primarja
Mis-sena skolastika li jmiss (Settembru 2010) il-klassijiet tal-5 u s-6 Sena tal-Primarja se jkunu qed jużaw dawn il-kotba:
Stilel 5 u Kalejdoskopju 5 għall-5 Sena
Stilel 6 u Kalejdoskopju 6 għas-6 Sena
Il-proċess kollu biex jintgħażlu l-kotba ħa sena. Fl-14 ta’ April 2009 deher l-avviż fil-Gazzetta tal-Gvern (nru 18,403) bl-isem “Sejħa għal Sottomissjoni ta’ Kotba għall-Kors tal-Lingwa Maltija għall-5 u s-6 Sena – Livell Primarju”. Il-kotba daħlu sat-28 ta’ dak ix-xahar stess u sadattant id-Direttorat ħatar bord ta’ esperti biex jagħżlu l-kotba. Dan il-bord kien magħmul minn għalliema fl-università u minn għalliema tal-5 u tas-6 Sena tal-primarja, immexxi minn uffiċjal fid-Direttorat. Il-bord fassal ċekkjatura biex jevalwa l-kotba u ltaqa’ tmintax-il darba.
Dawn il-kotba l-ġodda li se jidħlu fil-klassijiet tagħna se jkunu qed jieħdu post il-kotba Noli Noli (1, 2) u Nimxu Flimkien (9-12).
Għaldaqstant, b’sodisfazzjon, fil-klassijiet tal-primarja l-ilsien Malti qed nagħtuh nifs ġdid b’kotba ġodda li huma aktar attwali maż-żminijiet tal-lum u mat-tfal tagħna. Grazzi lil kull min ta sehmu fil-bord u nirringrazzja wkoll lill-pubblikaturi kollha li qed joffru lit-tfal tagħna riżorsi edukattivi sbieħ u ta’ kwalità tajba ħafna.
Nota: L-għalliema huma mitluba jgħarrfu lill-istudenti tagħhom biex ma jiktbux fuq dawn il-kotba. Dawn jinġabru fl-aħħar tas-sena skolastika biex jerġgħu jitqassmu fis-snin ta’ wara. Ara din iċ-ċirkulari dwar dan.
Data:
22/07/2010; Kategorija:
Varji;
Illum il-ġurnata tisma’ ħafna Maltin ikellmu lit-tfal żgħar tagħhom bi lsien it-trabi (motherese) li ġej mill-Ingliż. Ngħidu aħna, tisma’: horsey, shoesy, u doggy.
Jekk inti tixtieq tkellem lit-tfal żgħar tiegħek bi lsien it-trabi, ftakar li l-ġenituri tagħna kienu jużaw magħna kliem bħal: tuttu (għal żiemel) u kukka (għal bajda). Jekk trid il-lista sħiħa agħfas hawnhekk. Jekk taf bi kliem ieħor, iktbilna u għaddihulna.
Ftakar li l-lingwa Maltija tibqa’ ħajja dment li inti tiddeċiedi tużaha.
Data:
20/07/2010; Kategorija:
Varji;
Din hi l-preżentazzjoni li ntweriet xi xhur ilu waqt taħdita fuq l-ortografija li saret minn Carmel Azzopardi, il-President tal-Akkademja tal-Malti.
It-taħdita kienet organizzata mill-Akkademja tal-Malti.
Data:
30/06/2010; Kategorija:
Varji;
Wara s-suċċess miksub sentejn ilu bl-ewwel kors ta’ aġġornament ikkoordinat mill-Uffiċjal Edukattiv David Agius Muscat u mmexxi bi sħab mal-Kunsill Nazzjonali tal-Ilsien Malti, din is-sena applikaw 44 għalliem għal dan il-kors volontarju.
Din is-sena l-kors se jiffoka fuq l-aġġornament tal-grammatika, ir-riżorsi marbutin mal-proġett tal-lingwa, it-tħaddim tal-Malti bil-kompjuter u taħriġ fl-ortografija.
Ara l-programm tal-kors
Il-materjal b’rabta mat-taqsima fuq il-Malti u l-kompjuter (tal-Ħamis) issibu hawn:
Fil-qosor:
Kors Volontarju ta’ Aġġornament tal-Malti għall-Għalliema (V 35/10)
L-Użu tal-Malti fil-Kompjuter u Aġġornament tat-Tagħlim tal-Morfoloġija, l-Ortografija u l-Istorja tal-Lingwa
POST: Iċ-Ċentru tal-Konferenzi Mikiel Anton Vassalli, Sala A, l-Università, l-Imsida
DATI: Is-7, it-8 u d-9 ta’ Lulju 2010
ĦIN: 8.30 am – 12.30 pm
Data:
29/06/2010; Kategorija:
Varji;
Kulħadd jaf bid-Deċiżjonijiet 1 li ħareġ il-Kunsill Nazzjonali tal-Ilsien Malti fl-2008. Aħna ridna li dawn id-deċiżjonijiet isiru jafuhom sew l-għalliema kollha tagħna. Kien għalhekk li tul dawn l-aħħar sentejn dorna l-iskejjel tagħna u ltqajna mal-għalliema biex nispjegaw dawn id-Deċiżjonijiet.
Agħfas hawn u ara t-tabella bil-ġranet li fihom saru dawn is-sessjonijiet.
Data:
26/05/2010; Kategorija:
Avviżi;
Nifirħu lis-sinjuri Marlon Barbara, Ina Cutajar u George Mifsud għall-ħatra tagħhom bħala kapijiet ġodda tad-Dipartiment tal-Malti.
Nieħdu pjaċir li qed ikompli jikber it-tim ta’ nies li qed jaħdmu biex jitkompla x-xogħol fil-qasam tal-lingwa ta’ pajjiżna.
Data:
26/05/2010; Kategorija:
Varji;
Fid-29 ta’ April iltqajna mal-għalliema kollha tal-primarja ta’ Ħaż-Żabbar (A u B). Fit-12 ta’ Mejju ltqajna mal-għalliema kollha tal-iskola sekondarja tas-subien ta’ Ħal Kirkop.
Ħajr lis-Sur Olvin Vella u lill-Professur Manwel Mifsud li qed jgħinuna f’dawn it-taħditiet fuq l-ilsien Malti. Aħna ninsabu kuntenti bil-kummenti sbieħ li qed nirċievu fuq id-deċiżjonijiet li ħa l-Kunsill tal-Malti fuq l-ortografija.
Dan kollu jawgura tajjeb għall-ġejjieni ta’ lsienna u jalla nkomplu naħdmu flimkien biex il-lingwa Maltija tibqa’ tissaħħaħ mal-ġenerazzjonijiet li telgħin.
